Ang African Swine Fever kon A-S-F usa ka grabe ug paspas manakod nga sakit sa baboy tungod sa DNA virus sa pamilya sa Asfaviridea.
Kini ang gibutyag ni Dr. Julesben Caesar Maquiling, ang Veterinarian II sa Department of Agriculture kon DA region 10 Regulatory Division sa interview sa DXCC-RMN.
Matud ni Dr. Maquiling nga ang mga nasud nga naapektuhan sa A-S-F mao ang nasud sa Russia, Ukraine, Czech Republic, Moldova, South Africa, Zambia, Hungary, Bulgaria, Belgium, Latvia, Poland, Romania, China apil na ang Hong and Macau, Mongolia, Vietnam ug Cambodia.
Dugang pa niini nga motakod ang maong sakit pinaagi sa direct contact sa nagsakit nga baboy ug sa himsog nga baboy, indirect contact sama sa pagkaon sa mga kontaminadong bahog o lamaw, ug fomites o mga butang nga pwede magdala sa sakit sama sa sinina sa mga farm workers, boots, utensils ug sakyanan.
Apan giklaro ni Dr. Maquiling, nga dili angay mabalaka ang katawhan, tungod kay ang ASF dili makaapekto o makatakod sa tawo.
