Aguela muerto na accidente

Muerto el 63-anio de edad moher despues accidentalmente yan bangga conele el un service vehicle afuera mismo del su residencia na Manicahan del Sabado aga.
Con el victima ya conose como si Christina Alvarez Rebollos, del mencionao lugar.
Asegun na report del pulis pasada alas 6 del aga el un BAEC service vehicle ta maneha si Ellis Marc Dulaca Calisang hunto consu nana si Elsi Dulaca Calisang, 56, pasando sila na mencionao highway pero derepente asegun ya rebenta el un rueda del vehiculo.
Porcausa con este, nohay mas puede controla si Ellis con el guia del vehiculo hasta yan bagga este na poste del luz.
Pero por el fuersa, ya sigi pa siempre corre el vehiculo hasta yan bangga este con Rebollos quien aquel tiempo ta rega siembra afuera del diila casa.
Con Rebollos ya lleva na hospital pero ya despidi siempre este.
El caso ta esta pa baho na investigacion na estacion del pulis de Sangali.