Pasado na sa Kongreso ang House Bill No. 6875 kon Anti-Terrorism Bill sa boto’ng 139 nga mga Congressman ang nipabor, 31 ang nisupak ug 29 ang nag-abstained.
Usa si Agusan del Norte 1st District Rep. Lawrence Fortun nga nibarug sa hawanan sa Kamara del Representantis ug nisupak sa maong balaodnon.
Atol sa regular sesyun sa Kongreso gibutyag ni Cong. Fortun nga sa kampanya sa goberno batok sa terorismo kinahanglan usab maproteksyonan ang batakang katungod sa mga sibilyan.
Particular nga gi-kwestyon ni Cong. Fortun ang section 29 sa maong balaodnon nga nagtugot nga mabilanggo ang usa ka suspek sulod sa 14 ka adlaw ug mahimung malugwayan ug 10 ka adlaw bisan ug walay klarong akusasyon sanglit duol kini sa pag-abuso tungod kay bisan ang korte sa balaod wala nagtugot niini.
Dugang pagpaklaro ni Cong. Fortun nga wala siya misibog isip author sa maong balaodnon sanglit wala siya nag-sponsor niini sukad ma sukad.
