Nagresulta sang kamatayon sa duha ka mga mag-abyan ang isa kuntani ka masadya nga pagtipon tipon sang aksidente nga naglupok ang isa ka armas.
Patay ang isa ka pulis matapos gina-allege naghikog bangud nagresulta sa kamatayon sang iya suod nga abyan ang aksidente nga paglupok sang iya service firearm (Glock) mga las 8:05 kagab-I sa St. Martin Subdivision, Brgy. 1, Victorias City.
Ang biktima ginkilala kay James Karl Sernal, 26 anyos, residente sang Brgy. 6, Victorias City samtang ang suspek naman nakilala kay PO1 Dionel Lutao, 26 anyos, pumuluyo sang Brgy. 1, ciudad sang Victorias kag assigned sa Reconnaisance coy RMFB 6.
Suno sa imbestigasyon sang Victorias City Police Station, ang mga biktima upod ang ila iban pa nga mga kaabyanan ang naga-inom inom sa balay sang isa nila ka abyan sang natabo ang insidente.
Sa imbestigasyon sang pulis naga-gwa nga aksidente nga naglupok ang armas ni Lutao kag naigo sa ulo ang biktima nga si Sernal kon diin sang nahibaluan sang suspek nga naigu-an niya ang iya amigo, nagdalagan ini pagwa sang balay kag nagtiro man sang iya kaugalingon.
Pahayag sang mga witness, suno sa pulis nga nakabati sila sang tatlo ka lupok kag sang ulihi nakita nga naga-handusay na ang suspek.
Ang mag-abyan gindala pa sa Ikaayong Lawas Foundation sa Victorias apang gin-declare dead on arrival.
[image: image.png]
