Roxas City, Capiz- Isa ang patay samtang pilason ang tatlo ka mga persona sa bungguonay sa tunga sang Toyota Revo kag traysikol alas 9:30 ang takna kagab-e sa boundary sang Brgy. Cagay kag Brgy. Dinginan Roxas City.
Gindeklarar nga ginbawian sang kabuhi samtang ginabulong sa ospital ang driver sang motorsiklo nga ginkilala kay Cirjun Buñi y Gepanago,57-anyos ang pang-edaron sang Sibaguan, Roxas City matapos ini ang nag-angkon sang patal nga pilas sa ulo dala sang kabaskugon sang aksidente.
Samtang ginabulong man sa nagkatuhay nga mga ospital ang mga sakay sini nga sanday Noel Acutillar y Agusan,34-anyos sang Poblacion Sur Ivisan; Renaldo Amosig y Belonio,63-anyos ang pang-edaron kag Carlito Amosig y Belonio,61-anyos ang pang-edaron sang Brgy. Sibaguan Roxas City.
Nagaguha sa inisyal nga imbestigasyon sang mga kapulisan nga halin sa birthday party sa Brgy. Cagay sanday Buñi kag ginasubay ang dalan pauli na sang gulpi nga nag-agaw sang linya ang salakyan nga ginamaneho ni Hernan Rafael Joson,21-anyos sang Sitio Ilaya Brgy. Balijuagan, Roxas City kabangdan sang pagkasanggit sang salakyan sa nauna nga porsyon sang traysikol.
Nahibaluan nga madasig man ang dalagan sang Toyota Revo bangud nga dal-on man kuntani nanday Joson ang iloy sini nga si Yolanda Joson sa ospital bangud sa ginasuprer nga balatian.
