Kini ang abiso sa Davao City Disaster Risk Reduction and Management Office (CDRRMO) human sa daghang basura nga nakita sa lugar niadtong weekend, Enero 15, 2023.
Gawas niini, risgo usab ang lugar sa natural hazards sama sa pagpangahulog sa bato, landslides, ug pagbaha, labi na kung kusog ang pag-ulan.
Sa interbyu sa DXDC RMN Davao kang Police Staff Sergeant Mario Robert Saluta, personahe sa Calinan Police Station, gibutyag niini nga ilahang gina-monitor ang mga indibidwal partikular na kadtong muagi sa Tamayong padulong sa maong tourist spot.
“Actually, gibawal pa didto karon kay hugaw man gud daw. Daghan mangadto didto maghugaw-hugaw ra. Ang mga kahoy gipangputol. Mudagko (pud) og kalit ang sapa kay sige’g ulan, red rainfall. Isa pud na sa reasons,” sulti sa pulis.
Naka-alerto usab karon ang Barangay Councils sa Carmen ug Tamayong, Bantay Bukid, ug uban pang security cluster sama sa Sirib Emergency and Mountain Search and Rescue Auxiliary (SEMSRA) sa pag-monitor sa area.
RadyoMaN Kirby Manzon
