Davao City – Nasikop sa kapolisan ang usa ka suspect nga gituohang miyembro sa akyat-bahay human naglusad og Covert Patrol ala 1:00 sa kaadlawon ang San Pedro PNP sa milabay’ng adlaw sa may Sputnik, Doña Vicenta Village, Brgy. 11-B siyudad sa Davao.
Base sa report gikan sa San Pedro PNP, ang suspect naila nga usa ka Arphil Bahinting, 21 anyos, ulitawo, nagpuyo sa Purok 20, Sanggilangan, Brgy. Ma-a siyudad sa Davao.
Matud pa usa sa nabiktima sa suspect naila nga si Liza Advincula, 47 anyos, head caretaker ug stay-in-worker, nagpuyo sa nahisgutang lugar.
Sumala pa alas 3:15 sa kaadlawon samtang natulog ang biktima sa sulod sa apartment nakamatikod nga dunay kasikas sa bintana ug nakurat nalang nakit-an sa biktima ang suspect kinsa gilayon niambak sa likod nga bahin sa bintana bitbit ang cellphone niini nga mukantidad sa P10,000, lakip ang Gold Ring nga nagbalor og P5,000.
Nagpatabang sa usa ka guwardya aron gukdon ang maong suspek apan wala na kini maabti.
Swerte nga nagpatrolya ang kapolisan niadtong tungora hinungdan sa pagkasikop ni Bahinting.
Positibo nga gitudlo sa biktima ang suspect ug gituohan nga dunay kaubang nakasibat nga mao sila si alyas Dodong Puto ug alyas Dodong, pareho hingkod ang edad ug walay kompletong address.
Ang suspect nga si Bahinting priso na sa San Pedro PNP ug mag-atubang sa kasong qualified theft.
RadyoMaN Don Pulayao
