Alabel, Sarangani Province— Nakatakdang magpatuman ug total Lockdown kon No Movement ang lungsod sa Alabel, Sarangani Province karong umaabot nga adlawang domingo. Sumala pa ni Alabel Municipal Mayor Vic Paul Salarda, dungan sa No Movement nga ilang ipatuman, tanang establishemento sa lungsod sirado usab ug ang katawhan giawhag nga magpabilin sa ilang panimalay.
Tumong matud pa niini aron nga mapugngan ang pagkuyanap sa corona virus ug malimitahan ang mga tawo nga mosulod- gawas sa Alabel gikan sa mga kasikbit nga lugar gumikan niining padayong pagtaas sa mga nagpositibo sa covid 19 sa SOCCSKSARGEN area.
Kahibaluan nga sugod niadtong adlaw nga Lunes, Nagpatuman na ug border lockdown ang munisipyo sa Alabel, ug mahuman sa Septyembre 13. Pagpaklaro ni Mayor Salarda ilawom sa border lockdown nga ilang gipatuman, ang pwede lamang makasulod sa Alabel mao ang mga LSI nga adunay mga dokumento gikan sa mga coordinating agency, mga nagadeliver ug pagkaon ug uban pang mga essential nga gimbuhaton basta dunay mapakitang dokumento.
Pwede usab makasulod sa border sa Alabel ang mga tawo nga taga Malapatan, Don Macelino ug Glan basta dunay mapakitang travel pass nga gi-isyu sa ilang LGU. Gi-awhag usab sa opisyal ang mga pribadong kompanya sa maong munisipyo ng adunay mga empleyado nga dili residente sa Alabel nga mahatagan ug temporaryong kapuy-an o dili kaha hatagan nalang ug trabaho sa ilang panimalay hangtod mahuman ang border lockdown. (RV)
