Lider sa Dawlah Islamiya Socsargen Katiba ug igsuon niini patay sa Check point operation sa Surallah

33

Surallah, South Cotabato–Patay sa gipahigayong joint checkpoint operation sa Surallah Municipal Police Station, Polomolok PNP, PIB South Cotabato, 2nd SCPMFC ug 5SFBn Philippine army ang lider sa Dawlah Islamiya Socsargen Katiba nga si Geoffrey Nilong alias “Moy-Moy”/“Abu Omar”, 34 anyos, minyo, ug igsuon niini nga si Al-Amen Tuanadatu Nilong, 24 anyos, minyo, parehong nanimuyo sa Purok 2, Brgy Lapu, Polomolok, South Cotabato.
Sa initial nga report sa kapulisan, nakadawat matud pa sila ug Intel report nga adunay i-transport nga bomba gikan sa SPMX Box padulong sa Gensan agi sa Tboli, South Cotabato nga dala matud pa sa usa ka most wanted person gikan sa lungsod sa Polomolok.
Tungod niini, nagbutang ug check point sa mga lugar nga posibleng agian sa mga nasangpit. Sa check point nga gibutang sa Brgy Lamsugod, Surallah, upat matud pa ka mga tawo nga sakay sa duha ka motorsiklo ang nagdumili nga mohunong dihang sila gimanduan sa kapulisan ug militar.
Didto na natigayon ang binayluay ug bala nga miresulta sa kamatayon sa duruha apan malampusong nakasibat ang duha nila ka kaubanan. Na-rekober gikan sa lugar ang lima ka balinis sa bala sa kalibre 45 nga pistola, usa ka unit sa cal. 45 metal jacket, tulo ka empty shell sa kalibre 45 nga pusil, 25 ka cal. 9mm fired cartridge cases ug lima ka bala sa 9mm pistol.
Na-rekober usab gikan sa mga suspek ang back pack nga may sulod nga lima ka improvised blasting caps, 1 ka improvised grenade, usa ka remote control, unom ka motorcycle alarms, usa ka battery connector ug light tester, ingon man upat ka boosters, Duha ka light testers, usa ka complete circuit ug soldering lid. Nasayran nga si Geoffrey Tuanadatu Nilong alias “Moy-Moy”/“Abu Omar” adunay pending warrants of arrest sa kasong 2 counts sa Frustrated Murder nga adunay criminal case nos. 18-30784 ug 18-31551 nga gi-issue ni Hon. Judge Dennis Velasco sa RTC Branch 23, General Santos City ug gikonsidara isip top 16 most wanted person sa Provincial level. Sa karon nagpahigayon na ug hot pursuit operation ang kapulisan ug militar sa duha ka mga suspetsadong kaubanan sa namatay nga una nang nakasibat.
Photo Credit To: Angela Garnet Principe Escleto

Facebook Comments