General Santos City–Gipaniguro ni Police Major Ray Salgado ang hepe sa Alabel Municipal Police Station nga sila andam kanunay nga mohatag ug seguridad sa buhatan sa Alamcco kansa gitapuk-an karon sa mga investors nga gustong i-withdraw ang ilang mga investment.
Sumala sa opisyal nga sila uban ang Provincial Mobile Force Battalion andam nga mohatag ug ayoda pinaagi sa pagpatuman ug hugot nga seguridad sa lugar sa tumong nga walay mahitabong gubot luyo sa pag-alboroto sa pipila ka miyembro sa kooperatiba.
Nasayran nga adlawng Lunes dihang daghang mga miyembro niini ang nahidangat sa maong buhatan aron unta mag withraw sa ilang mga investment apan migawas nga wala gihapon narelease.
Dugang pagbutyag ni Police Major Salgado nga ila usab ginapasabot ngadto sa katawhan nga anaa sila sa lugar gumikan lang sa paghatag ug siguridad aron nga mapugngan ang posibleng kagubot.
Sumala sa opisyal nga dili niya buot nga mahitabo sa Alabel ang nahitabo sa ubang lugar nga adunay mga buhatan sa investment scheme nga nagsara nga gipangguba ang mga gamit ug gipangkuha ang mga mapuslang mga butang.
Giklaro usab ni Salgado nga wala silay gidapigan sanglit igo ra silang magbantay sa seguridad.
