General Santos City- Nagmaoy sa kaugalingong panimalay ang usa ka lalaki hinungdan sa pagkaguba ang ilahang mga butang sa may Purok Maunlad, Silway-8, Polomolok, South Cotabato, alas 9:00 kagabii.
Samdan usab sa ulo ug tuong bahin sa mata ang amahan sa maong suspek nga si Ramon Pasan Tauro, 57 anyos, minyo, mag-uuma ug lumulupyo sa nasampit nga lugar, human nga kalit lang nga gidunggab ug botilya sa maong suspetsado.
Nakahiagom usab ug samad sa walang kamot ang suspek gumikan matud pa sa paggunit niya sa buak nga botilya nga maoy gigamit sa pagpandunggab sa iyahang amahan.
Sumala sa sumbong sa inahan sa suspek nga giilang si Imelda Pasan, 49 anyos, minyo nga nakainom ang iyahang anak sa dihang iyahang gibuhat ang maong krimen ug matud pa niya nga aduna usab siyay sakit sa pagpangutok.
Kasamtangang anaa pa sa kustodiya sa PNP Polomolok ang maong suspek ug andam ng I- turn over sa mga awtoridad didto sa Davao Mental Hospital aron matagaan ug dugang pagtagad. ( Joan Gubalani- intern)
Photo from web
