General Santos City—kulatado ang usa ka amahan nga si Benjamin Desmundo, 63 anyos nga taga barangay Lagao, Gensan human kining giayo-ayo ug kulata sa iyang kaugalingong anak alas 3:00 sa kabuntagon didto mismo sa ilang panimalay.
Sumala sa biktimang amahan nga niuling hubog ang wala niya nganling anak dayon nagmaoy sulod sa ilang panimalay.
Wala pa kini makontento, iyang gibunalan ang kural sa ilang mga silingan mao nga gisita sa biktima, apan inay mupatuo sa iyang amahan, gikulata na nuon niini ang biktima diin nakaangkon ug dakong samad sa iyang ulo nga bahin.
Dugang pagbutyag ni Benjamin nga dili kini maoy unang higayon nga sila nagbingkil sa iyang anak gumikan sa batasan niini higayon nga kini mahubog.
Aduna na usay daghang reklamo ang iyang anak sa lagao police station tungod sa punay niini nga pagmaoy sa ilang lugar.
Buot karon sa amahan nga ipadakop ang iyang anak tungod siya nabalaka nga basin sunod niining pagmaoy subli na usab siyang pasakitan o dili ba kaha ang iyang mga silingan.
