General Santos City—sikop ang usa ka amahan human nga nanghostage ug anak sulod mismo sa ilang panimalay sa Natad Subd., Barangay Lagao, General Santos City.
Suspek giila nailang si Rogelio Opiar Tumulak alias Junjun, 38, residenti sa maong lugar. Nasayran nga alas 4:30 ang takna sa hapon dihang nabolabog ang mga silingan sa nahisgutan human nga nagmaoy kini sulod sa ilang panimalay.
Naggunit ug duha ka sundang ang nahisgutan samtang duha ka mga anak niini ang dili niya pagawason sa ilang panimalay. Tungod niini ang iyang mga silingan mireport sa buhatan sa Lagao Police Station aron nga marescue ang mga bata.
Gilayon nga nangayog tabang ang Lagao PNP ngadto sa operatiba sa SWAT kansa maoy nakig-negotiate ngadto sa suspek aron nga iyang irelease ang iyang mga anak.
Gikan alas 4:30 alas 6:45 sa gabie na dihang hingpit nga nakumbinsi ang suspek nga iyang buhian ang duha ka sundang hinungdan nga nakahigayon ang kapulisan nga marescue ang mga bata.
Gilayon nga gisikop ang suspek dayon giposasan ug gidala sa presento sa kapulisan. Nasayran nga ang suspek maoy nagmatuto sa duha niya ka mga anak human nga nagtrabaho sa abroad ang iyang asawa.
