Patay ang usa ka amahang gituohang drug pusher samtang sikop ang iyang anak sa gihimong drug buybust operation, pasado alas-3:00 sa hapon niadtong Lunes sa Barangay Poblacion Marawi, sa Marawi City.
Giila sa pulis ang namatay nga si Bokhari Medico Alawi, 50 anyos, samtang ang sikop iyang 19-anyos nga anak nga si Salharie, pulos mga residente sa nasangpit nga barangay.
Kauban sa Marawi City Police Station ang 82nd Infantry Battalion, Philippine Army, ang Provincial Drug Enforcement Unit sa Lanao del Sur ug uban pa’ng unit sa Philippine National Police, gihimo ang buybust operation batok sa duha nga miresulta sa pagkamatay ni Bokhari.
Nasabtan niini nga pulis na diay ang iyang ka-transaksiyon hinungdan nga mi-una na kini og pamusil hangtud nga nakigpinusilay sa uban pang operatiba, matud pa ni Col. Thomas Pantaleon, hepe sa Marawi police.
Miingon si Pantaleon nga taud-taud nang nadawat nila ang impormasyon kabahin sa operasyon sa amahan ug anak apan niining bag-o lang sila nakakuha og confidential agent nga suki sa mga suspek.
Upat unta ang target sa maong operasyon kagahapon apan nakaikyas ang duha.
Na-recover sa maong operasyon kagahapon ang usa ka kalibre 38 revolver nga adunay bala, walo ka sachet sa gituohang shabu lakip na niini ang gipalit sa police asset ug ang usa ka libo ka pesos nga buybust money.
Gilayong gikuha sa pamilya ang patay’ng lawas sa suspek samtang ang nadakpang kauban ang anaa na karon sa kostudiya sa Marawi police ug nag-atubang sa kasong paglapas sa Republic Act 9165 o Dangerous Drugs Act ug RA 10591 o Comprehensive Law on Firearms and Ammunitions.
