Davao City – Nagpakitabang ang amahan sa estudyanteng misulay og suicide human wala sila atubangi sa maestro nga matud pa mi-bully sa iyang anak pinaagi sa wala pagpirma sa clearance.
Personal nga midangop sa sibyahanan sa DXDC RMN Davao si alyas Otto, usa ka taxi driver, ug nagpatambag sa lakang kung unsaon nila pagpatubag sa maong maestro nga wala mipakita kanila human giadto sa Daniel R. Aguinaldo National High School (DRANHS).
“Ang gusto gyud nako maka storya kay naglagot ko anang tawhana na… daghan pod nagreklamo nga mga estudyante niya… giadto namo gahapon pero wala magpakita,” segun sa mireklamo.
Saysay ni Otto nga Lunes sa gabii namatikdan niini nga lain ang nilihokan sa iyang anak apan wala lang kini nagpakabana gumikan basin gikapoy lang kini ug stress.
“Lunes sa gabii namatikdan nako nga lain anv nilihokan sa among anak apan pagmata namo alas 3 nakita namo nabulagta siya sa salog diay to daghan na siya’g problema,” matud ni Otto.
Daling gidala niya kauban sa iyang asawa sa Southern Philippines Medical Center (SPMC) ang biktima.
Dugang sa amahan nga tulo ka bulan na usab nagsabak ang iyang 18 anyos nga anak.
“Ingon ko nak nganong nabuhat man nimo ni? Lisod kaayog imong gibuhat ni unya atubangon nimo ang naa sa taas unsoan nimo pagtubag nga naghikog man ka? Advice-an nimo’g storya di na siya motingog,” tataw sa amahan.
Kasamtangang gina-obserbahan pa sa mga doktor ang biktima hangtod karon ug gikatakdang ipa-ultrasound aron masiguro nga luwas ang gisabak niini.
Subay niini, tabangan ug alalayan sa mga Public Service Team sa DXDC si alyas Otto aron mapadangat ang reklamo ngadto sa Department of Education (DepEd) Davao Region.
RadyoMaN Jason Amisola
