Boluntaryong misurender kaganihang alas 2:45 sa kadlawon sa kapulisan sa Gingoog City ang amahan ug anak nga wanted sa kasong pagpatay.
Ang mga suspek mao silang Juanito Sacal ug iyang anak nga si Joseph Sacal.
Misurender ang duha ngadto kang Police Supt. Ariel Philip Pontillas, Acting Chief of Police sa Gingoog City Police Station.
Nasayran nga misurender ang mga suspek pinaagi sa tabang sa ilang paryente nga si Corporal Rodel Sacal, miyembro sa 30th Infantry Batallion, Philippine Army sa Surigao del Norte.
Matud ni Pontillas nga nahitabo ang kasong pagpatay niadtong Hunyo 20 ning tuiga sa Purok 4, Barangay Odiongan, Gingoog City.
Gibutyag sa hepe nga ang biktimang si Ramon Salugsugan namatay tungod sa 21 ka samad dinunggaban sa lain-laing bahin sa lawas.
Gidugang ni Pontillas nga dunay 100-thousand pesos nga reward money nga gigahin ang pamilya sa biktima aron masikop ang maong mga suspek.
PC: Tsip Aye – Police Supt. Ariel Philip Pontillas
