Apisar sang resulta sang DNA test, wala sa gihapon nagapati ang amay sang suspek sa pagpatay kag paghimulos sa 10-anyos nga babaye sa banwa sang Murcia, nga nahimo sang iya bata ang krimen.
Sa interview sang DYHB kay Edgar Gonzaga, amay ni Edgie Gonzaga nga suspek sa paghimulos kag pagpatay sa 10-anyos sa kampo sang tubo sa Hacienda Lizares, Purok Delton, Barangay San Miguel, sadtong Oktubre 31, 2019, wala siya nagapati nga ginhimo sang iya bata ang krimen.Suno sa amay, wala nakahalin sa ila balay si Edgie sang adlaw antis nasapwan ang bangkay sang biktima pasado las-8:00 sang gab-i sang Oktubre 31, bangud iya ini ginbilinan sang ulubrahon.
Kadungan sang pagpanginwala sang alegasyon sang rape, wala man nagapati si Edgar nga nagagamit sang druga si Edgie matapos nga ini ang nadakpan man sa buybust operation sang Mayo 26, 2020. Suno sa amay, makatilingala nga gindakop sang kapulisan ang iya bata bangud wala man ini naga-intra sa iligal nga druga.
Madumduman nga mismo si Murcia Mayor Gerry Rojas ang nagpresentar kay Edgie sa mga katapo sang media matapos naguwa ang resulta sang medical report, sa diin nakit-an sa kinatawo sang biktima ang “sperm function” nga ginapanag-iyahan sang suspek sa naggwa nga DNA Test.
[image: image.png]
