Ambulansya bumunggo ha toyota innova nga sarakyan, 5 samaran

TACLOBAN CITY – Bumunggo an ambulansya ha toyota innova ha Brgy. Guinob-an Lawaan, Eastern Samar kanina han alas 11:30 han aga, May 20.

Subay ha report han Police Regional Office 8, ginkilala an driver han ambulansya nga hi Carlito Aguilar Bagas, 57 anyos, residente ha Borongan City, Eastern Samar.

Ginkilala naman an mga sakay han ambulansya nga hira John Bacoto Del Caraga, 16 anyos, Ryan Caraga Cabral, 35 anyos ngan an pasyente nga hi Winefredo Pomarca Caraga, 69 anyos, mga residente ha Brgy. San Isidro, San Julian, Eastern Samar.


Ginkilala naman an driver han toyota innova nga hi Mr. Larry Dean Silhanek, 69 anyos, usa nga American Citizen.

Ha report, pareho nga ginbabaybay han duha nga sarakyan an kakalsadahan tipakadto ha Brgy. Guinob-an Poblacion, Lawaan Eastern Samar pero pag-abot ha Baybay beach tigda nga lumiko pawala an toyota innova nga *mayada* signal lights pero nag overtake an ambulansya nga nagresulta han ira pagkabunggo.

Samaran naman an mga biktima upod na an mga sakay han ambulansya.

Nadara naman an pasyente sakay han iba nga sarakyan tipakadto ha Tacloban samtang gindara ha pinakaharani nga hospital an mga samaran.

Facebook Comments