SILAY CITY – Amay patay matapos ginlabu sang iya manlang nga bata nga may madugay na kainit kag kaugot.
Ang biktima ang ginkilala kay Ricky Tormes, 58, sang Hacienda Carmel, Barangay E.Lopez.
Ang bata nga suspetsado amo si Ryan Tormes, 28, sa amu man nga lugar apang nagatrabaho sa Hacienda La Purisima Concepcion sa amu man nga barangay.
Suno sa suspetsado nga anak antis nagluntad ang krimen las 11:45 kagab-i, hubog sila nga duha upod ang tatlo pa sini ka mga kaupdanan nga karga-tapas matapos nag-inom sang whisky.
Las 6:30 palang sang gab-i, nagsugod na sila inom pero nanotisyahan nga wala nagabugnuhanay ang mag-amay suno sa isa ka upod nila nga si Jonan.
Pahayag ni Jonan nga naghambal pa sa iya si Ryan nga patyon nya ang iya amay, pero sa iya pagpati ini ang nagalahog.
Nakibot nalang siya nga ginsulod ni Ryan ang kwarto sang iya amay bitbit ang lantip kag pagkatapos naghambal pa sa iya nga patay na ini.
Nakit-an nya pa nga ginhugasan ni Ryan ang lantip, ginbutang sa iya atubangna matapos nga napatay sini ang amay sa diin nabatian nya pa ang pagpangayo sang bulig sang tagumatayon.
Sa interview ni RadyoMaN Melandro Benetua – Silay City Correspondent kay Ryan iya ginsiling nga madugay nya na nga handom kag dumot nga patyon ang iya tatay.
Pahayag ni Ryan nga sang 12 anyos siya, iya gid nakit-an kon paano ginpatay sang iya amay ang iya iloy paagi naman sa paglampos sang banga sa iya nga ulo.
Ang amu nga insidente sang hubin pa sya amu ang nagtulod sa iya nga indi maglawig, matimalos niya ang iya iloy sa pintas nga amay.
Iya pa ginsaysay kon anu kasakit ang mga naaguman nila nga mag-utod kastigo ilabi na kon magpauli ang ila amay nga hubog kon gab-i.
Ini tanan nga mga kainit kag kaugot nagtingob tubtob nga nabutang niya ang hustisya sa kamot, Domingo sang gab-i.
Matapos nagluntad ang krimen bulontaryo naman nagsungka kag ara karon detained sa custodial facility sang Silay City PNP samtang ginahanda ang kaso nga parricide. / Melandro Benetua photo
