Anak sa 64 anyos na tagpusil-patay sa Brgy. Luna, Surigao City tag-angkon na daan may hulga sa kinabuhi an ija inahan
Tag-angkon nan anak sa tagpusil-patay na 64 anyos sa Brgy. Luna, Surigao City na nakadawat daan nan hulga sa kinabuhi an ija inahan na si Nineta Zaragosa adisir pa nahitabo an krimen.
Sumaya pa ni Maribeth Garcia, an isa sa anak ni Zaragosa, pipila ka buyan an nolabay daan may hulga ini sa kinabuhi pero tagbalewaya ra niini kay hugot an pagsalig ngadto sa Ginoo. An mga hulga an tagpaagi sa personal na pag-istorya, tawag sa cellphone, may manuktok sa ila panimayay ug usahay may mohunong na sakyanan duol sa ila taghuy-an.
Dugang pa niini, dili na lamang sila motudlo kon sin-o an ila tagdudahan na nohimo sa krimen, an mga tawo an nakabayo na tanan. Tagpangajo nila na unta maangkon an hustisya pero posible isab na dili mahatag ngadto sa ila kay pobre ra sila, Ginoo na lamang an matud pa magpaigo sa ila labi na sa responsable sa pagpapatay sa ila inahan.
Plano sa pamilya na sa umaabot na Sabado sa buntag tagtakda ilubong si Zaragosa sa Public Cemetery. Kon kahinumduman, adton Domingo Pebrero 14 sa hapon tagpusil-patay si Zaragosa nan isa isa ka gunman na nagsakay nan motorsiklo sa may Ceniza, Brgy. Luna, Surigao City.
