General Santos City—Angol ang anak sa usa ka barangay Kagawad human misukol ug nakigpinusilay sa kapulisan atul sa gipahigayong buy-bust operation. Natigayon ang insidente sa Tiongson St. Brgy Lagao ning dakbayan, kung asa gipahigayon sa City Drug Enforcement Unit (CDEU) sa pagpanguna ni Police Senior Inspector Fernando Manuel, ang nasampit nga operasyon.
Giila ang nahisgutan nga si John Rafael Eco Alyas Toto, anak sa usa ka barangay kagawad, taga-Niyog St. Brgy Dadiangas South ning siyudad. Kasamtangan kining anaa sa talandugon nga kahimtang sa sa St. Elizabeth Hospital human nakaangkon ug samad-pinusilan sa ulo.
Una niini, gikabutyag nga positibong napalitan ug shabu si Eco sa kantidad nga usa ka libo ka pesos, dihang miaksyon ug sibat sakay sa iyang pula nga multicab.
Gigukod siya sa kapulisan, kung asa nabanggaan pa niini ang usa ka itum nga Hilux sa dalan. Dihang miaksyon matud pa nga daw sa may gibunlot ang suspek, giunhan na lamang kini ug tiro sa kapulisan nga maoy hinundgan nga nakaangkon ug samad-pinusulan.
Narekober sa kapulisan ang gigamit nga armas sa suspek, samtang, mipalag ang pamilya ni Eco sa nadangatan sa nasangpit, ug gihingusgan nga wala kini bisyo, hilabi na sa iligal nga droga. Padayon pang giimbestigahan sa kapulisan ang naasoy’ng insidente, samtang nagpabilin ang nasampit sa Intensive Care Unit sa St. Elizabeth Hospital.
