Davao City- Bisan kun halayo pa ang hustisya, itumod na sa iyang katapusang kapahulayan si Horacio ‘Atio’ Castillo III, freshman law student sa University of Sto. Tomas kinsa nakabsan sa kinabuhi sa usaka initiation rites nga nisangko sa dugoong panghitabo.
Si Castillo, neophyte sa ‘Aegis Juris’ fraternity sa naasoyng pamosong unibersidad nangandoy unta nga mamahimong senador o bin ba kaha mamahimong Chief Justice sa Korte Suprema sa nasud apan kansang damgo daw nahimo nang daman ug bangungot karon alang sa iyang mga mahal sa kinabuhi.
Usaka misa ipahigayon sa may Santuario de San Antonio Parish sa Forbes Park, Makati City karong alas-2:00 sa hapon antes pa nga molahos ang funeral convoy paingon sa Parañaque City alang sa lubong.
Ang insidente nagbanhaw pag-usab sa taudtaud nang debate kun deliberasyon kalabot sa total ban on hazing, outlawing of Greek-lettered fraternities ug sororities, paghikyad sa mas taas ug bug-at nga silot sa mga nagpasimuno sa makamatay nga initiation rites ug ang pag-abli pag-usab sa diskusyon sa capital punishment restoration.
Usa ka primary suspect giilang si John Paul Solano nitahan na sa iyang kaugalingon ug nitug-an na sa tanan niyang nahibaw-an sa krimen ug sa posibilidad nga siya himoong state witness kontra sa mga Aegis frat elders ug masters nga involved sa hitabo.
Karong Oktubre 12, usaka hearing buksan sa hawanan sa Senado haron pupu-on ang klase-klaseng mga sugyot ug rekomendasyones aron pagkibra sa deadly hazing incidents nga nikutlo na sa dili maihap nga kinabuhi sa mga kabataang aduna untay naghulat nga ‘promising careers.’
RadyoMan June Duterte
