Ginpaathag sang anay chairman sang Committee on Finance and Appropriations sa Sannguniang Panlalawigan sang Negros Occidental kun ngaa nagasobra sa ceiling ang Personal Services (PS) sang probinsiya sa pila na katuig.
Sa interview sang DYHB kay anay Board Member kag karun Cadiz City Mayor Salvador “Bading” Escalante, tuig 2016-2017 nagsugod ang paglapaw sang ceiling sang PS sang probinsiya sa tion anay ni Governor Alfredo Maranon Jr. bangud sang re-organization sang province lakip na ang pag-upgrade sang health services partikular na ang mga district hospitals nga santo man sa mando sang Department of Health (DOH). Nagsugod man ang massive instructure sa probinsiya lakip na ang mga economic enterprises nga ginalakipan sang mga hospitals.
Apang suno kay Escalante, nagpaguwa sang memorandum ang Department of Budget and Management (DBM) nga ang mga economic enterprise nga wala naga-income kaangay sang district hospitals ang dapat ibalik sa general fund sang province ukon ipasira. Apang nagpanindugan naman si Gov. Maranon suno kay Escalante nga padayunon ang operasyon sang mga district hospitals bangud isa man sa iya mga programa ang health services para sa mga Negrense.
Dugang pa ni Escalante, kapin sa 40 porsyento sang mga empleyado ang probinsiya ang yara sa health services ukon ang mga assigned sa mga district hospitals. Nagpanindugan man ang probinsiya nga indi lapaw ang PS pagkatapos sang tagsa katuig bangud sang madamo nga bakante nga posisyon apang nagaguwa ang audit report sang DBM base sa ginasumiter nga budget.
Sa nahibaluan nga si Provincial Budget Officer Jose Percival Salado ang gindagdagan sang 60-day preventive suspension ni Gov. Eugenio Jose Lacson bangud sang mga audit observation report sang DBM bangud sang nagalapaw nga ceiling sang PS sang probinsiya.
[image: image.png]
