BACOLOD CITY- Aminado si former Governor Rafael Coscolluela nga mabudlay ang pagpadalagan kon wala sang resources. Ini ang rason kon ngaa wala sang plano ang anay gobernador nga magpadalagan liwat nga governor sang probinsiya sang Negros Occidental ukon alkalde sang Bacolod City sa 2022.
Sa isa ka presscon, ginpahayag ni Coscolluela nga wala siya sang plano nga magbunggo kay Bacolod City Mayor Evelio Leonardia ukon magbutang kontra sa alkalde apang frustrated siya kon paano karon ginapalakat ang ciudad.
Tuman ka political ang pagpadalagan sang Bacolod City suno sa anay gobernador kag may nagakabaton ini nga feedback halin sa private sector nga mabudlay ang pag-communicate sa city government ilabi na sa pagpabutyag sang ila sentimyento kag mga rekomendasyon.
Ang ciudad kaangay sang Bacolod nga may yara sang dynamic nga private sector, dapat nga i-manage nga wala nabase sa pulitika suno kay Coscolluela. Nagtapos ang termino ni Coscolluela bilang gobernador sang Negros Occidental sang 2001.
[image: image.png]
