Sa pinakauna nga kahigayunan matapos gindismiss sang Office of the Ombudsman, nagpakita sa publiko pinaagi sa Facebook si anay Mayor Jed Patrick Mabilog.
Makita sa post ni Mabilog ang Family picture upod sa iya asawa nga si Mrs. Marivic Mabilog kag duha nila ka kabataan kaupod ang mensahe para sa Paskuwa.
Ini ang labing una nga nag-post ang anay Alkalde sa social media matapos ginserbehan sang dismissal order sang katapusan nga semana sang Oktubre sini nga tuig.
Subong man, nagapabilin nga likom ang lugar kon sa diin sa karon ang pamilya Mabilog bangud sa security reason.
Madumduman nga wala na nakabalik sa pungsod ang anay Alkalde humalin sang magtambung ini sa speaking engagement sa Japan sang bulan sang Setyembre kag sa amo man nga bulan, nagdiretso ini sa Malaysia para sa gihapon sang isa ka speaking engagement.
Subong man, bangud sa kainit sang sitwasyon kag sa kabalaka sa iya seguridad, nag-file ang anay alkalde sang leave of absence tubtub sa katapusan sang Setyembre apang nag-extend ini liwat sang isa pa ka bulan nga leave kon sa diin wala na gid ini makabalik kasunod sang paguwa kag pagserbe sang iya dismissal order.
Gin-post ni Mabilog ang Family picture kag ang ila Christmas greetings sang Disyembre 24, bisperas sang Paskuwa.
