Maayon, Capiz – Patay ang 33-anyos nga si Jeffrey Dicon alyas Tata matapos ginluthang sang isa ka BPAT member nga ginkilala sa kay Jomel Dorado alyas Jack 43-anyos sa Barangay Balighot, Maayon, Capiz sang nagligad nga adlaw.
Base sa imbestigasyon sang mga kapulisan, yara nagapungko sa tiangge sang isa ka barangay kagawad ang miyembro sang BPAT nga si Dorado sang nag-abot ang biktima nga si Dicon kag liwat nga nagbinaisay. Nagbunot sang 45 kalibre nga armas luthang ang suspek kag ginluthang ang biktima.
Nag-angkon sang igo sa dughan ang biktima nga si Dicon, apang nakabalos pa ini sang sumbag sa suspek nga si Dorado. Bangud sang fatal nga igo sang bala sa dughan, nagpangluya ang biktima kag gindala ini sa Bailan District Hospital apang gindeklarar nga dead on arrival.
Madasig naman nga nagpalagyo ang suspek pagkatapos nga makumiter ang krimen. Nahibaluan nga may hiligut-anon nga nagapatunga sa duha, matapos ginkursunadahan kag ginpulihan sumbag sang grupo ni Jeffrey Dicon ang suspek si Jomel Dorado sang nagligad nga adlaw sang Sabado. Liwat nga nagsumalang ang ila banas kag nagluntad ang pagpangluthang.
*(photo from web)*
