Gilayon man nga nakaguwa temporaryo ang anay Municipal Treasurer sang Sara, Iloilo nga si Edna Pacrim, 63 anyos matapos boluntaryo nga nagsurrender sa kapulisan alas 9:30 kaina sang aga.
Ini matapos magbayad ini sang 5.06 Million pesos nga piyansa sa iya ginapangatubang nga 46 ka counts sang kaso nga paglapas sa anti-graft and corrupt practices act.
Ginpahayag ni Police Sr. Inspector Gilbert Baldevarona, hepe sang Sara PNP nga may warrant of arrest si Pacrim kag madugay na ini nga gina-monitor sang tracker team agud arestuhon.
Subong man, kaina sang aga, nagtawag sa Sara PNP si Pacrim kag nagpahibalo nga luyag sini magsurrender kabangdanan nga ginpadulungan ini sang kapulisan sa iya balay sa Barangay Apelo, Sara kag ginserbe ang warrant of arrest.
Matapos maaresto, gilayon man nga nagbayad sang piyansa si Pacrim para sa iya temporaryo nga kahilwayan.
