Nagtaliwan na si anay Iloilo Second District Congressman Augusto “Boboy” Syjuco Jr. sa edad nga 77-anyos sang nakaligad nga adlaw sang Lunes.
Indi pa ma-athag ko ano ang kabangdanan sang kamatayon sang anay Kongresista nga nagserbe man nga Director-General sang TESDA sadtong Administrasyon ni anay Presidente Gloria Macapagal-Arroyo.
Napatay si Syjuco sa Singapore samtang ginapabulong sa balatian nga madugay na niya nga gina-antus.
Gilayon naman nga ginpa-cremate sang pamilya Syjuco ang bangkay sang anay Kogresista sa nasambit nga pungsod matapos ini mapatay.
Nagserbe si Syjuco bilang Kongresista sang Second District sang Iloilo humalin sang 1998 tubtub 2004.
Sang nakaligad nga bulan sang Agosto, na-convict sa kaso nga fraud sa Sandiganyaban si Syjuco matapos gin-ako sini ang kasal-anan sa 4.3 million pesos nga cash grant sa Department of Agriculture gamit ang iya pork barrel funds sadtong kongresista pa siya.
Una na nga ginpasugtan sang Second Division sang anti-graft court si Syjuco nga mag-plea bargaining agreement sa kaso sini bangud sa nagaluya sini nga ikaayong lawas.
