CEBU CITY—Gibalik na sa Cebu City Government ang college scholarship ug ang examination sugdan karong Abril 23 hangtud Mayo 7 karong tuiga sa nagkalain-laing pampubliko nga eskwelahan sa Siyudad.
Gi-anunsyo ni Konsehal Joy Augustus Young nga ang Gobiyerno sa Siyudad nagsige pa og hatag og college scholarships para sa mga residente sa Siyudad kinsa ni-gradwar gikan sa publikong eskwelahan sa Sugbo.
Dugang ni Young nga nihunong lang sila og duha ka tuig katong panahon nga walay ni-gradwar sa high school tungod sa implementasyon sa senior high school.
Para karong tuiga, ang Siyudad adunay budget nga P202 million para sa scholarship program.
Sa tanang gusto ma-iskolar, ania ang mga kwalipikasyon:
1. Kinahanglan nga naka-gradwar siya sa usa ka publikong eskwelahan sa Siyudad 2. Kinahanglan nga ang iyang ginikanan residente sa Siyudad sa Sugbo 3. Ang mga naka-gradwar sa private secondary schools aduna pay tsansa nga maka-apply sa scholarship program kana kung iskolar sila sa ilang gi-eskwelahan nga private school
Sigon ni Young nga sugod karong tuiga, kinsa tong ni-gradwar sa mga miaging tuig pwede nang mo-apply sa scholarship program kung makapasar lang sila sa eksamin.
Ang usa ka City Government iskolar adunay P10,000 financial assistance taga-semester ug P1,000 school supply allowance. Ang mga iskolar gikan sa mountain barangays adunay P1,000 transportation allowance.
Ang mga iskolar mahimong mo-enrol sa bisan asa nga university o college diri sa Siyudad nga accredited ubos sa scholarship program.
Pahibalo ni Young nga para sa mga interesadong ma-iskolar ug adunay mga dugang pangutana, pwedeng mobisita sa iyang opisina sa City Hall.
