BACOLOD CITY – Kon ang mga kabataan lang ang pasugtan, indi na sila luyag pa nga magbalik sa ila balay ang ila iloy nga nagbiya sa ila kag sa ila amay sang makapila ka beses sa isa ka barangay diri sa ciudad sang Bacolod.
Ini ang pahayag sang 21 anyos nga anak, ikaduha sa 6 ka mga kabataan, sang isa ka babayi nga ginpa-blotter sang iya bana matapos nga iya ginapalayas si mister bangud may gina-palangga na ini nga iban nga lalaki.
Apang, matapos nagpamalibad ang bana nga magbiya sa ila balay, si misis na lamang mismo ang naghalin sa ila puluy-an kag ginbayaan ang ila 6 ka mga kabataan.
Reklamo sang bana nga isa ka trisikad driver nga sadto naglakat sa Manila ang iya asawa agud mag-trabaho, apang matapos ang masobra isa ka tuig, ini ang nagpauli nga nagabusong sa iban nga lalaki.
Apesar sini, ginbaton gihapon ni Mister si Misis, apang sining karon lang, natukiban nila nga may gina-tabo tabo nga iban naman nga lalaki ang asawa nga rason sang ila pag-away tubtub nga luyag palayason sang asawa ang iya bana sa ila mismo balay.
Suno naman sa 21-anyos nga bata nga lalaki sang mag-asawa, siya mismo ang nakadakup sa ila nanay nga may gina-text nga iban nga lalaki.
Pahayag sang bata na makapila ka beses na ini nga ginahimo sang ila iloy apang pirme lang ginapatawad sang ila amay, gani kon sila lang ang masunod mas maayo pa nga indi na lang magbalik sa ila balay ang ila nanay.
Nahibaluan nga ang asawa nagatrabaho sadto sa kampo kag karon naga-panglabada sa pila ka mga balay sa ila lugar./Web photo owthare.blogspot.com
