Sarangani News–Aprobado na kagahapong adlawa atol sa regular sesyon sa Sangguniang Panlalawigan ang Annual Budget 2019 sa Provincial Government sa Sarangani may pondo kini niabot og One Billion Two Hundred Eighty Million ka pesos.
Dakog bulto sa Annual Budget 2019 ang nakatagana sa padayon nga pagpasemento sa mga kadalanan sa tibuok Sarangani Province, pagpabarog sa mga water system, mga tulay og dagko pang imprastraktura, ang pagpanindot pa sa operasyon sa mga hospital og sa serbisyong panglawas, edukasyon sa mga kabataan, panginabuhian sa mga residente, pagpakusog sa turismo, pagpangandam og pag-responde panahon sa kalamidad, og ang makanunayong pag-amping sa kinaiyahan, ilalum tanan sa Sulong Sarangani flagship program ni Governor Steve Chiongbian Solon.
Kagahapon, gipasa pud sa SP ang Supplemental Budget Number 3 maoy mu-pondo sa mga galastuhan sa Sarangani Provincial Government una pa man matapos ang tuig 2018. Adunay gi-alokar nga Trese Milyones ka pesos (P13M) alang sa dungag pasilidad sulod sa Sarangani Provincial Hospital. Aduna usab gi-pondo nga Singko Milyones ka pesos (P5M) alang sa pasiuna nga pagpasemento sa dalan padulong sa hapit na maabrihan nga Regional Drug Rehabilitation Center nahimutang sa Kawas, Alabel.
Og ang pagpatindog sa sea wall sa Lagundi, Kiamba may alokasyon nga P2.7 Milyones ka pesos. P3.3 Milyones ka pesos pud ang gidungag pondo aron kadtong mga taga-Sarangani nga ma-hospital sa mga hospital sa Gensan ang matabangan pa sa Provincial Government.
