General Santos City–8 ka mga lambigit sa iligal nga droga ang sikop sa managlahing drug operation kapulisan sa lungsod sa Polomolok , South Cotabato.
6 ang nadakpan sa usa ka resort nga nahimutang sa Barangay Pagalungan, Polomolok, human sila napalitan og mukabat sa P100, 000.00 sa gituohang shabu sa usa ka pulis nga nagpakarong-ingnong poseur buyer.
Mukabat sa kinatibuk-ang kantidad nga P200,000.00 sa gikatahapang shabu ang nakumpiska sa kapulisan sa unom ka mga suspek. Una nang giangkon sa mga nahisgutan nga sila naggamitan ug droga apan ilang gihimakak nga sila nagabaligya niini.
Subay sa report sa Polomolok Municipal Police Station nasayran nga front sa mga nasangpit ang pagpamaligya ug prutas nga abokado apan ang tumong diay sa mga nahisgutan ang pagpamaligya ug iligal nga droga.
Sa pikas bahin laing duha ka mga lambigit sa droga ang nasikop sa kapulisan sa laing operasyon sa usa ka gasolinahan nga nahimutang sa sentrong bahin sa lungsod sa Polomolok.
Napalitan ang mga nasangpit ug (1) ka sachet sa gituohang shabu gamit ang P500.00 nga marked money.
Sa karon ang mga suspek balhog na sa silda sa Polomolok PNP ug gindam na ang kasong kalapasan sa RA 9165 batok sa mga nasangpit. (Jennilyn Sacal, RMMC Intern)
