General Santos City—Ginapabot nalang karon sa land Transportation Office (LTO) Region 12 ang kamanduan sa ilahang head office aron ipatuman ang REPUBLIC ACT No. 10586 o mas naila nga Anti-Drunk and Drugged Driving Act of 2013 sa kinatibuk-ang rehiyon.
Ang maong balaod magsikop sa mga driver nga naga maniho sa ilang mga sakyanan nga anaa sa impluwensya sa bino o dili ba kaha iligal nga droga.
Sumala pa ni LTO Regional Director Macario “bong” Gonzaga nga niadtong milabay nga simana adunay niabot sa syudad nga mga training officer gikan sa kauluhan aron usab nga subling ipailaum sa pag bansay ang mga law enforcers sa Region 11 ug Region 12 kabahin na sa pagpatuman sa maong balaud.
Dugang pa niini nga nahuman na ang ilahang training hinungdan nga pipila ka mga adlaw gikan karon posible nga magpahigayon na sila ug operasyon batok sa mga driver nga misupak sa maong balaod tungod sa karon aduna na usab silay mga himan aron nga masayran kung naka-inom ang ilang mga gidudahan. (Dave Silagan)
