General Santos City—mukabat ngadto sa P340,000.00 nga kantidad sa gikatahapang shabu ang narekober sa PDEA-12 inubanan sa PNP Regional Intelligence Unit-12, PDEG SOU 6, Tacurong CPS ug Task Force Talakudong atol sa gihimong buy-bust operation sa may National Highway, Brgy. Poblacion, Tacurong City, Sultan Kudarat, 12:50 ang takna sa udto niadtong nakalabayng adlaw.
Giila ang suspek nga si Allan Ameril, 36, minyo, tricycle driver ug residenti sa Brgy. Sugadon, Ampatuan, Maguindanao. Nasikop ang nasangpit human nga napalitan ug gituohang shabu sa nagpakarong-ingnong poseur buyer gamit ang P1,000.00 nga marked money.
Sa kinatibuk-an mukabat sa (50) gramos sa gituohang shabu ang nakuha sa posisyon sa suspek nga mukantidad ug P340,000.00; P1,000.00 nga marked money; ug (1) ka unit sa cellphone.
Kasong kalapasan sa Section 5 (Sale of Dangerous Drugs) sa Article II, ilawom sa RA 9165 (The Comprehensive Dangerous Drugs Act of 2002) ang gipasang-at sa PDEA-12 ngadto sa suspek.
