Apat ka mga second level hospital sa South Cotabato ang may kapasidad nga magmanage kag isolate sang mga Person`s Under Investigation ukon PUI may angot sa 2019 Novel Coronavirus Acute Respiratory Disease.
Ang nasambit nga mga ospital amo ang Howard Hubbard Hospital, South Cotabato Provincial Hospital, Dr. Arturo Pingoy Medical Center kag Allah Valley Medical Specialist.
Apang ang problema lang suno kay Provincial Epidemiology Surveillance Unit Officer Celia Lorenzo amo ang kakulangan sang personal protective equipment nga gamiton sa tion nga may kaso sang NCov sa probinsya bisan sa mga nasambit nga ospital base sa ila nga inventory.
Ginklaro man ni Lorenzo nga ang PUI ang tawo nga may history sang travel sa China, Macau, Taiwan kag Hongkong nga may sintomas sang coronavirus kapareho sang lagnat, ubo, sip-on kag nabudlayan magginhawa amo nga dapat idiritso dal-on sa nasambit nga mga 2nd level hospital
Samtang sa ginpatigayon nga consultative meeting kahapon nga adlaw sang Integrated Provincial Health Office sang South Cotabato upod ang PNP, PDRRMO DOLE, DTI, DILG, Presidente sang Association of Barangay Captains, media kag iban pa ginplastar ang mga preparasyon, himuon kag papel sang kada concern agency kag partners batok 2019 novel coronavirus agud nga indi maka sulod ang nasambit nga balatian dire sa probinsya.
Lakip sa mga himuon ang pag-istablisar sang Barangay Health Emergency Response Team para sa madasig nga pagpalab-ot sang impormasyon kon may mga residente sa ila lugar nga may history sang travel halin sa mga pungsod nga may kaso sang 2019 NCov ARD, pagpabakod sang advocacy, pagbakal sang dugang nga personal protective equipment kag iban pa bilang kabahin sang preparasyon batok NCov ARD.
