Ginlockdown umpisa subong nga adlaw Hunyo 25, 2020 ang apat ka mga purok sang Brgy. Lambayong sa nasambit nga banwa, matapos nga nagpositibo sa COVID-19 ang isa ka polis nga nagpauli sa ila balay sang Hunyo 12 nga halin ini sa Malalag, Davao del Sur.
Suno kay Mayor Leonard Escobillo ang mga purok nga ginlockdown sa sulod sang walo ka adlaw amo ang Pagkakaisa, Pag-asa, Mabuhay kag Bagong Silang sang Brgy. Lambayong.
Paklaro niya pa nga ginlockdown ang apat ka mga purok tungod naggwa sa ila nga balay ang polis imbes nga maghome quarantine.
Nahibaluan nga nagnegatibo sa COVID-19 sang ginpaidalom ini sa rapid test sang nagpauli sa Tampakan sang Hunyo 12.
Apang kahapon nga adlaw gin-impormar sila sang local government unit sang Malalag nga nagpositibo sa RT PCR test ang polis nga naasign sa ila lugar nga nagbalik sang Hunyo 16.
May-angot sini, suno kay Mayor Escobillo gilayon naman nga nagpatigayon sang contact tracing sa mga may direkta nga kontak sa nasambit nga polis nga yara na sa 14 ka mga persona kag nakahomequarantine sa subong.
Samtang ivalidate nila subong nga adlaw suno sa alkalde kon pasado ang puluy-an sang mga direct contact para maghomequarantine sila, apang kon indi isaylo ang mga ini sa quarantine facility.
Ginsiguro naman sang opisyal ang ayuda sa ginabulubanta 400 ka mga pamilya nga apektado sang walo ka adlaw nga lockdown sa apat ka mga purok.
Nagapati naman si Mayor Escobillo nga wala nakuha sang polis sa Tampakan ang COVID-19.
Apela niya naman sa mga pumuluyo sang Tampakan nga indi magpanic tungod ginahimo man sang LGU suno pa ang tanan nga indi maglapta ang nasambit nga balatian.
