Apat ang nadakpan sa ginpatigayon nga duha ka separado nga Oplan Paglalansag Omega and Salikop ukon pagpatuman sang entrapment kag buybust operation sa La Carlota City kag Kabankalan City.
Las 11:30 kahapon sang aga sa Brgy. Ayungon, ciudad sang La Carlota dakup ang mga suspek nga nakilala nga sanday Gerald Acabo, 32 anyos, soltero, job order sang Bacolod DRRMO, Antonio Geva, 30 anyos, lunsay pumuluyo sang Prk Cereza South, Brgy. 3, Bacolod City kag JenJen Flores, 25 anyos, dalaga, pumuluyo sang Brgy. Mansilingan.
Nakuha sa ila possession ang kapin 49,000 pesos nga boodle money, duha ka .45 calibre nga pistol, mga bala, 2 ka motorsiklo kag isa ka traysikol.
Sa Kabankalan City, dakup man ang isa ka lalaki bangud sa paghupot sang armas nga wala sang nagakaigo nga lisensya sa Sitio Overflow, Brgy. Hilamonan las 7:30 kagab-i.
Sa ginpatigayon nga operasyon sang Criminal Investigation and Detection Group sa pagpanguna ni Police Chief Master Sgt. Ramiro Gocotano nadakpan ang suspek nga si Regie Carsales, 55 anyos, kasado, pumuluyo sang Brgy. Tanawan, ciudad sang Kabankalan.
Nakuha sa suspek nga masobra 19,000 pesos nga boodle money, isa ka 12 gauge shotgun, live ammunitions kag isa ka motorsiklo.
Base sa pagpangusisa ang amo nga mga suspek ang miembro sang Tonggo Group nga involved sa gunrunning activities nga naga operar sa Bacolod City kag probinsya sang Negros Occidental.
[image: image.png]
