Roxas City, Capiz- Masobra sa P12-milyones pesos pa ang nabilin nga pundo para bulig sa mga mangungoma nga naapektohan sang bagyo Agaton.
Aminado si Mrs. Sylvia dela Cruz, hepe sang Office of the Provincial Agriculturist sang Capiz, nga na-delay ang pagpanagtag sang nasambit nga ayuda sa mga mangungoma bangod sa indi mapaiway nga sirkumstansya.
Kalakip diri ang ulihi nga pagsumite sang husto nga listahan sang mga apektado nga mangungoma sa mga banwa nga napaidalom sa state of calamity, limitado nga mga otorisado nga personel para sa pagproseso sang cash advance, limitado nga pundo nga ginahatag para sa pag cash advance bangud sa regulasyon sang Commission on Audit, kag ang paghiwat sang mga dalagko nga mga kahiwatan sa probinsya subong sang Capiztahan kag barangay eleksyon.
Sa ginhiwat nga tingob nga sinapol sang Provincial Disaster Risk Reduction and Management Council, Provincial Peace and Order Council kag Provincial Anti-Drug Abuse Council sining karon lang nga ginpamunuan ni Governor Antonio Del Rosario, ginpasalig ni Dela Cruz igahatag ang nabilin pa nga P12,736,800 pundo para sa mangungoma.
Suno pa sa iya nga kapin na sa P13,076,100 ang nagapanagtag nga bulig para sa nasambit nga mga apektado nga mangungoma, sa diin, ang mga mangungoma sa Pontevedra, Sigma kag Panitan ang tanan na nakabaton sini, samtang nagapadayon man ang pagpanagtag sang bulig pinansyal sa banwa sang Maayon.
Nakahanda naman para sa pag-cash advance ang pundo para ipanagtag sa mangungoma sa banwa sang Cuartero kag Mambusao.
Masobra sa 25-milyones nga pundo ang nauna na nga ginpain sang gobyerno probinsya sang Capiz gikan sa iya calamity fund para igabulig sa mga mangungoma sa mga banwa nga ginpaidalom sa state of calamity.
By : Jemin B. Guillermo/PIA-Capiz
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
