Nananawagan si House Committee on Justice Vice Chairman at Bukidnon 2nd District Representative Jonathan Keith Flores sa Korte Supreme na magpasaya na sa motion for reconsideration ng Kamara kaugnay sa impeachment complaint laban kay Vice President Sara Duterte.
Paliwanag ni Flores, mahalaga ang pasya ng Supreme Court para matukoy kung kailangan bang baguhin ang umiiral na patakaran ng Kamara kaugnay sa impeachment proceedings.
Kung tutuusin ayon kay Flores ay hindi dapat sinasapawan ng Supreme Court ang patakaran ng Kamara dahil sila ay co-equal branch na hindi dapat dinidiktahan ang isa’t isa.
Punto pa ni Flores, sana ay maagang nagpapasya ang high tribunal lalo’t batid nito na posibleng may panibagong impeachment complaint na ihahain laban kay VP Duterte habang ngayon naman ay nakahain na sa kamara ang unang impeachment complaint laban kay Pangulong Ferdinand Bongbong Marcos Jr.
