Na –file na ang kaso batok ni Architect Rey Galua, apan sa fiscal office pa.
Kini ang gikompirma sa abogado niini nga si Atty. Art Ubaub.
Matud ni Atty. Ubaub nga sa mga ebedensiya nga nakuha sa kapolisan ug Criminal Investigation and Detection Group kon C-I-D-G Cagayan de Oro sa panimalay ni Architect Galua, duha lamang ka armas ang giangkon sa iyang kliyente.
Kini mao ang caliber.45 ug caliber 9mm nga mga lisensiyado, apan ang nakuha nga duha ka granada, usa ka caliber 45 ug caliber 38 ug mga magazine, dili panag-iya ni Architect Galua.
Kini ang hinungdan nga nakaingun sila nga planted ang mga nakuhang ebedensiya, tungod kay ang maong mga ebedensiya gisulod sa bag, ug walay bag nga sama niadto ang iyang kliyente.
Samtang giklaro ni Atty. Ubaub nga naa sa pitaka ni Architect Galua ang iyang lisensiya sa duha niini ka armas atol sa pag-imbargo.
Matud ni Atty. Ubaub nga luyo niini, nga wala siya ansayud sa tumong sa C-I-D-G kung nganung giapil og sumbong ang naay lisensiya.
Dugang pa ni Atty. Ubaub, nga iyang gikasubo ang nahitabo, tungod kay iyang nasayran nga pag-abot sa CIDG sa panimalay ni Architect Galua, human nga gimanduan kini nga ipapuyo, adunay duha ka nakaunipormeng polis ang miuna sa pagsulod ug gisekreto sa pagpalihok.
Human sa pagsulod, gitawag dayun si Architect Galua uban ang iyang asawa, ug gitudlo kanila ang duha ka granada nga nakita ug caliber. 45 nga armas.
By: RadyoMaN Mishelle Mesias-Enloran
