SAN CARLOS CITY, NEGROS OCCIDENTAL – Ginkakibot karon sang halos tanan nga empleyado sang San Carlos City Government ang paghikog sang isa ka architect nga empleyado sang ciudad kahapon sang aga sa sulod sang isa ka patyo sa Rizal Street, San Carlos City.
Nakilala ang biktima nga si Architect Hans dela Victoria, assigned sa City Engineers Office sang San Carlos City.
Suno sa imbestigasyon sang San Carlos City Police Station, pasado las 7 kahapon sang aga sang nasapwan ang bangkay sang biktima sa atubang sang pantyon sang iya lolo sa sulod sang San Carlos Memorial Cemetery nga yara sa Rizal Street sang amo nga ciudad.
Ara man ang iya salakyan sa lugar sang ginhimo nya ang pagsuicide.
Base sa pagpangusisa, may igo sang bala sa iya tuo nga dughan ang biktima nga naglapos pa sa iya likod.
Nakita man sa tuo nga kamot ni dela Victoria ang isa ka calibre .45 nga armas nga suno sa claim sang iya asawa, iya ini sang biktima.
Sa ginpatigayon naman nga post mortem examination sa bangkay sang biktima, wala sang may nakita nga foul play ang medico legal officer sa kamatayon ni dela Victoria.
Wala pa gid nahibaluan kon bala anu ang motibo sang iya pagsuicide bangod bastante man ini sa kwarta bangod sa iya trabaho kag profession.
Nahibaluan nga ang biktima ang miembro sang isa ka kilala nga pamilya sa San Carlos City./dyHB BACOLOD
