CAPIZ– Arestado ang duha ka mga suspek sa pagpangawat sang mga motorsiklo matapos ang ginpatigayon nga operasyon sang mga kapulisan sa nagkatuhay nga lugar sa probinsiya sang Capiz.
Narekober sang mga kapulisan sa mga suspek nga ginkilala kay Juanito Sevilla 19-anyos kag 17-anyos nga menor de edad, lunsay residente sang Barangay Balucuan, Dao, Capiz ang isa ka tricycle kag duha ka motorsiklo.
Ginpahayag ni Police Captain Efren Yu-ing, hepe sang Dao PNP nga natigayon nga nadakpan ang duha ka mga suspek bangud sang sang gintingub nga pwersa sang Highway Patrol Group, Sigma kag Dao PNP.
Una nga nadakpan ang menor de edad samtang nagamaneho ini sang motorsiklo nga ginkawat sa banwa sang Sigma.
Wala naman nakaluwas sa mga kapulisan si Sevilla kun sa diin narekober sa iya ang tricycle nga ginkawat sini sa Barangay Adlawan kag isa pa gid ka motorsiklo sa banwa sang Dumarao.
Pagapasakaan naman sang kaso nga pagbayular sa anti-carnapping act si Sevilla samtang ang menor de edad ang posible nga igapaidalum sa paghinakop sang DSWD. Natalana naman nga igaturn-over sa mga tag-iya ang mga ginkawat nga mga motorsiklo kag tricycle.
