Pagadian City – Usa ka semana una ang eleksyon, nasapon sa tropa sa 53rd Infantry ‘Matapat” Battalion ilalom sa 1st Infantry Tabak Division ang armadong grupo nga sakay sa duha ka pick-up nga walay plaka numero samtang kini nagbyahe sa bisinidad sa Brgy. Danlugan ning syudad sa Pagadian.
Nakuha sa posisyon sa armadong kalalakin-an ang daghang matang sa high-powered firearms nga gikarga sa maong mga sakyanan lakip ang personal nga gamit.
Atubangan sa personahe sa kasundaluhan ug sa tinugyanan sa Commission on Elections (Comelec) Zamboanga del Sur , tagsa-tagsa nga nagpaila sa ilang kaugalingon ang mga nadakpan diin lakip niini ang duha ka pulis nga nadistino sa Pagadian City Police Station.
Sa kinatibuk-an, dese nuebe ka indibidwal ang nadakpan nga karon gikostudiya sa Pagadian City Police Station ug trese kanila ang na-imbargohan og armas.
Giila ang mga nadakpan nga sila si Joel Morales, Celso Labayo, Ken Redondo, Anthony Basaya, Art Tesorio, James Mendiola, Randy Abad, Antonio Onac, Juvy Siabok, Jimmy Mendiola, Junifer Daud, Michael Ganub, Juniven Sebag, Monching Angalay, Alvin Dela Cruz, Dioscorio Escario, Jason Escario ug ang duha ka police officer nga sila si Police Senior Master Sergeant Rex Barmedo ug Police Corporal Michael Dagupan.
Nakumpiska sa ilang posisyon ang lima ka unit sa M16 Rifles, pito ka ihap sa calibre 45 nga pistola, duha ka 357 revolver, usa ka 9mm Pistol, usa ka caliber 38, usa ka caliber 22 ug 17 ka bonnets.
Paglapas sa Akta Republika 10591 o mas naila nga Comprehensive Firearms and Ammunition Regulation Act ug pagsupak sa COMELEC Resolution No. 10446 (1) THE BAN ON BEARING, CARRYING OR TRANSPORTING OF FIREARMS OR OTHER DEADLY WEAPONS ang kasong atubangon sa mga nadakpan.
