ESCALANTE CITY, NEGROS OCCIDENTAL – Nagapati ang mga katapo sang Philipine Army nga may napatay sa bahin sang mga rebeldeng NPA sa natabo nga enkwentro may mga las 10 kahapon sang aga sa Sitio Puting Bato, Brgy. Washington, Escalante City.
Ginpahayag ni Col. Benedict Arevalo, Brigade Commander sang 303rd Brigade Philippine Army kagab-i sa programa El Vigilante, nga antes natabo ang engkwentro, nakabaton sila sang impormasyon halin sa mga sibilyan nga may sightings sang mga rebelding CPP-NPA sa amo nga area.
Sa ila pag-responder, didto kag naka-enkwentro sang tropa sang gobierno ang ginabulubanta kapin 10 tubtub 15 ka mga miembro sang rebelding hubon.
Suno kay Arevalo nga apesar wala sila sang na-recover nga bangkay, daku naman ang ila pagpati nga may casualty sa rebelde bangud posible ginbitbit ukon gintago sang mga ini ang pilason nila nga miembro.
Kalakip sa na recover amo ang isa ka M16 Assualt Rifle, isa ka calibre .45, magazine, 2 ka saku sang bugas 2 ka container sang tubig kag personal nga kagamitan sang rebelde.
Sa karon nagapadayon ang hot pursuit operation sang Philippie Army batuk sa mga naka-enkwentro sini nga rebelding NPA./ Photo courtesy of 303rd Brigade
