Pormal nga gi-abi-abi sa 55th Engineer Brigade, Philippine Army ang bag-o niini nga commanding officer, niadtong Lunes, Agosto 5, sa headquarters niini sa Barangay Maria Cristina, Baloi, Lanao del Norte.
Sa usa ka simple nga seremonya, gitunol ni Acting Commander Col. Irineo Sebastian, ang command symbol ngadto sa bag-ong commander nga si Col. Nestor Abando, kinsa nagsilbi nga deputy commander sa 51st Engineer Brigade, nga naka-base sa Libis, Quezon City, sa wala pa ang maong change of command ceremony.
Sa interview sa media, miingon si Abando nga ang iyang liderato mopadayon sa nasugdan nga mandato sa 55EB nga motabang sa rehabilitasyon sa Marawi City nga maoy labing unang hinungdan sa pag-reactivate niini niadtong Marso karong tuig 2019.
Miingon si Abando nga sunod bulan mahidangat sa Baloi ang dugang puwersa sa Army Engineers nga deretsong ipadala ngadto sa Marawi City aron motabang sa rehabilitasyon.
Ang tropa sa Army Engineers maoy gitahasan sa pagpangita ug pagpabuto sa mga bomba o unexploded ordnance sulod sa most affected area sa Marawi City nga naguba atol sa lima ka bulan nga giyera sa gobyerno niadtong tuig 2017 batok sa Dawlah Islamiya.
Milingkod si Sebastian isip acting commander human nag-leave si Brigadier General Ramon Ruiz tungod sa hisgutanan sa panglawas. Wala na kini gibalik sa 55EB tungod kay gitakda naman usab kining molingkod sa mas taas nga posisyon.
Sukad niadto, si Sebastian na usab ang gibutang nga commander sa Joint Task Group Builder, ang team sa mga sundalo nga maoy gitahasan sa mag-recover ug pag- detonate sa mga UXOs.
Ang 55EB na deactivated niadtong 2013 isip kabahin sa defense planning guidance aron mag-streamline sa organisasyon, apan subli kining gi-activate human ang unom ka tuig arong motabang sa rehabilitation and rebuilding sa Marawi.
Sa kasamtangan, ang usa ka batalyon niini nga mao ang 551st Engineer Battalion ang nagtabang usab sa GMA Kapuso Foundation sa pagtukod og tulo ka andana nga school building sa Datu Saber Elementary School sa Barangay Datu Saber nga naa gawas as most affected area.
