BACOLOD CITY – Mga paha, kutsara, barbecue stick ukon asalan kag madamo nga iban pa ang natigayon nga ma-confiscate sa ginpatigayon nga sorpresa nga Greyhound Operation sa Metro Bacolod District Jail.
Kaina sang kaagahon ang gintingub nga pwersa sang Bureau of Jail Management and Penology, National Bureau of Investigation kag ang SWAT sang Bacolod City Police Office lakip na ang pila ka mga police personnel ang nagpatigayon sang amo nga surprised Greyhound Operation.
Nahibaluan nga katuyuan sang Greyhound Operation nga matapna ang pagsulod, pag-gamit kag pagpalakat sang mga kontrabando sa sulod sang prisohan agud man nga mahatagan proteksyon ang publiko, mga empleyado kag mga bilanggo.
Ang amo nga mga illegal nga kontrabando ang nakuha halin sa tagsa ka mga dormitory sang mga priso.
Samtang, ginpahayag naman sang Community Relations Service sang Taculing BJMP nga si JO1 Jasmine Batadlan nga wala sang may narecover nga illegal nga druga subong man paraphernalia sa amo nga operasyon.
Ini na bagay ang ginpasalamatan sang daku ni Jail Warden Superintendent Larry Fuentes kon diin gintumod niya ang padayon nga kooperasyon sang kapin 666 tanan ka mga inmates sang amo nga bilangguan./dyHB BACOLOD
