Patay ang 39 anyos nga asawa nga si Jackielyn Polotan human gitigbas sa iyang bana tungod sa selos.
Gibutyag ni Police Chief Insp. Rogelio Manalang sa Villanueva Municipal Police Station nga nag-ilis ang biktima aron unta molakaw apan wala kini makadayon tungod kay naglalis na sila sa iyang banang si Joy Polotan, 49 anyos.
Tungod sa migrabeng panaglalis, nahinaykan sa bana ang asawa busa natigbasan kini niya sa ulo sa bolo ug nakaangkon ang asawa sa tulo ka samad ug gidunggab pa kini sa dughan gamit ang 15 inches nga kutsilyo.
Dugang pa ni Chief Insp. Manalang nga misulay pa sa paghikog ang bana apan dali kining nadala sa ospital hinungdang natabang kini sa mga doktor.
Nahitabo ang insidente pasado ala-1:30 kagahapon sa hapon sulod sa kwarto sa magtiayon sa Villanueva, Misamis Oriental.
Gibutyag usab sa maong opisyal nga anaa sa balay ang upat ka anak sa magtiayon apan wala silay nahimo kay gisirad-an sa suspek ang ilang kwarto.
