Asawa nga OFW makatatlo ka beses sang may kainit nga bana

ISABELA, NEGROS OCCIDENTAL – Trahedya nga makabig ang nadangtan sang isa ka OFW nga babayi nga napatay matapos nga ini siya ang ginbuno sang tatlo ka beses sang iya bana pasado las 2 kahapon sang hapon sa Had. Alicante, Brgy. Bungahin, banwa sang Isabela.

Ginkilala ang biktima nga si Angela Pojas-Arevalo, 25 anyos ang edad, isa ka Overseas Filipino Worker sa Kuwait kag tumandok sang Isabela.

Ang suspek naman nga bana nakilala kay Arnaiz Arevalo, 27 anyos ang edad, Alyas Apid, wala sang permanente nga trabaho.


Suno sa utod sang biktima nga si Eidelyn, si Angela ang naglakat sa Kuwait sadtong tuig 2016 kag iya ginbilin ang duha nila ka mga kabataan, isa ka lalaki nga siete anyos kag babayi nga apat ka tuig ang edad, sa iya bana sa balay nila sini sa Sitio Baclayan, Brgy. Bulad, Isabela.

Apang, gindala naman sang suspek ang duha nila ka mga kabataan sa lugar sang iya pamilya sa Brgy. Alicante.

Nagpauli sa Negros sadtong Setyembre 6 ang biktima apang wala sila nagkit-anay sang iya bana bangud nga may nagaluntad na nga problema sa ila relasyon durante nga ini ang nagatrabaho sa luwas.

Apesar sini, padayon ang sustento ni Angela sa ila mga kabataan bangud nga wala man sang permanente nga trabaho ang iya bana.

Sa iya pag-abot, nagdesisyon ang biktima nga kuhaon na lamang ang ila duha ka mga kabataan bangud kon indi, suno sa iya, indi gid siya maka-supot supot sang kwarta.

Pasado las 2 kahapon sang hapon sang nag-abot si Angela kag iya utod sa Hacienda Alicante kon diin ila nasugata sa dalan ang pito ka tuig nga bata sini samtang sa pag-abot naman sa balay, iya naabtan ang isa pa niya ka bata nga babayi nga nagadungaw sa bintana kon diin wala na sila sang may nakita pa nga iban nga tawo.

Suno sa utod ni Angela, nakibot na lamang sila sang hinali na nag-gwa halin sa likod si Arnaiz, nagpalapit kay Angela kag gilayon niya ini nga ginsumbag sa tiyan, gin-uyatan sa buhok kag ginbuno sa sulok-sulok.

Nakadalagan pa ang biktima apang ginlagas ini sang suspek kag ginsundan pa gid sang buno kag sang natumba, iya pa gid ini ginsakyan kag liwat nga ginbuno.

Sa panugiron sang utod sang biktima, mapintas nga tawo si Arnaiz bangud bisan pa nga nagabusong sadto si Angela, ini siya ang masami nga ginatapungol sang suspek.

Samtang, ginsiling sang utod ni Angela nga gin-ako sa iya sang biktima nga may nakita ini nga nobyo sa Kuwait nga amo ang iya gintiniran sang pagpauli niya sini nga Setyembre kag ini ang nahibaluan man tanan sang iya bana.

Sa karon padayon ang pursuit operation sang Isabela Municipal Police Station sa suspek nga si Arnaiz kasunod nga ini ang at large matapos nahimo ang krimen./dyHB BACOLOD

Facebook Comments