Patay ang usa ka asawa human nga milagpot sa gisakyang motorsiklo ug nalatayan sa trailer truck sa Barangay Lapinig, Balingoan, Misamis Oriental pasado alas otso kagabie.
Matud ni Police Master Sergeant Jonathan Aguillon- ang Chief sa traffic investigator sa Balingoan Municipal Police Station, naila ang biktima nga si Reggie Fabela Saraos, 33 anyos, taga Parola, Barangay Macabalan ning syudad.
Nasayran nga samtang sakay ang biktima sa motorsiklo nga gimaneho sa bana niining si Ardee Saraos, mi-overtake kini sa usa ka trailer truck sa tuo nga bahin apan tungod kay balason ang giagi-an niini nga area na slide ug na trapo ang mga biktima.
Kini ang hinungdan nga maayong pagkapasok sa asawa sa trailer truck ug nalatayan.
Sa karon gisuta sa kapolisan sa Baligoan Municipal Police station kung adunay contributory negligence ang driver sa trailer truck nga si Marvin Seth nga taga Tubod, Lanao del Norte kinsa kasamtangang gikustodiya sa kapolisan.
Samtang possible nga wala makapanggunit ang asawa sa iyang bana samtang nagdagan ang motorsiklo.
Kini ang gibutyag ni Police Master Sergeant Aguillon tungod kay kung nakagunit ang asawa sa bana, nakauban kini sa pagkalabay sa iyang bana sa tuo nga bahin ug dili sa wala nga bahin kung asa kini nalabay.
Dugang pa ni Master Sergeant Aguillon nga ang gigamit nga motor sa mga biktima mao ang MIO YAMAHA nga klase nga daling maligyas kung makatunob og ligyas nga dalan tungod sa kagagmay sa ligid niini.
