General Santos City–Hustisya ang gustong maangkon sa asawa ni Police Staff Sargeant Manny Rebueno kansa gipusil patay sa usa ka tanod sa Brgy.Poblacion Kiamba Sarangani Province nga si Dennis Petargue residente sa nasampit nga lugar.
Pagbutyag sa asawa niini nga si Alyas Joy nga nakurat na lamang siya sa nahitabo sa iyang bana nganong gipusil kini gumikan kay wala siyay nahibaw-an nga dunay nahitabong bingkil tali sa iyang bana ug ang suspek.
Dugang saysay sa nasampit nga asawa nga basi sa pamahayag sa anak sa suspek nga usa ka drug surrenderee ang iyang amahan ug duna napod kini nakulatahan sa lugar nga usa ka empleyado sa DENR.
Matud pa ni alyas Joy nga kanunay matud pa nga muoli ang iyang bana sa ilang panimalay gikan sa estasyon aron nga bisitahon ang iyang mga anak.
Gipaklaro usab niini nga wala siya kabalo nganong niabot ang iyang bana didtong lugara ug sumala pa niini nga tungod siguro sa iyang trabaho isip anaa sa intel mao nga bisan asa lang maadto nga lugar ang iyang bana.
Kahibaloan nga una nang gipusil patay ang nasampit nga pulis sa brgy.tanod samtang anaa kini sa lamay human giilugan ug armas ug gipusil sa makadaghang higayon sa lawas niini nga miresulta sa kamatayon sa pulis.(Reynald Timario)
